ቃል ሓዘን

 ንኽልተ ዓመት መመላእታ ዝኸደ ኣዝዩ ኣዕናዊ ዝዀነ ኲናት ሕድሕድ ኣብ ኢትዮጵያ ተኸሲቱ ከም ዝነበረ ዓለም ምሉእ ብሓዘን ዝዝክሮ ኲነት እዩ። ስሙ ደኣ ኲናት ሕድሕድ ይበሃል እምበር ህግደፍ ወሲካ ብርክት ዝበሉ ኣካላት ንፈደራላዊ መንግስቲ ኢትዮጵያ ዝዘርዩ ነይሮም እዮም። ኦ..ህዝቢ ትግራይ ናይ‘ዚ ኩሉ ዝወረደ መቕዘፍቲ ግዳይ ከም ዝነበርካ ህዝቢ ዓለም ተዓዚቡ ኢዩ። ናይ መነባበሪኻ ንብረት ባዲሙ፣ ብሚእትታት ኣሽሓት ዝቚጸሩ ዝተፈላለየ ዕድመ ዘለዎም ኣካላት ህዝብኻ ክሃልቁ ከለዉ ዓለም ምሉእ ዝርኣዮ ጉዳይ‘ዩ። ውግእ ጠጠው ምስ በለ እውን ቃንዛ እናሃለወካ ንኹሉ ብትዕግስትን ቃንዛን ትሓልፎ ኣለኻ። በቶም ተወሃሂዶም ብመደብ ከጽንቱኻ ዝተሃንደዱ ንምክልኻል፣ መንእሰያትካ ምስ ኣያታቶምን ሳንዳታቶምን ንበረኻ ከም ዝወፈሩ ትፍለጥ ኢኻ። እዚ ከምዚ ኢሉ ከሎ ኣብ ግዜ ውግእ ብዘይፈጸምዎ በደላት ዝተቐተሉን መሪር መቕዘፍቲ ዝወረዶምን ነብስኻ ኣጸናኒዕካ ተቐቢልካዮ ኢኻ። ብተወሳኺ ንህዝቢ ትግራይ ንኽከላኸልሉ ዝወፈሩ ከይተረፈ ብዙሓት ከም ዝተሰውኡ ግምት ነይሩካ እዩ። ዘይፈለጥካዮም ግን መን ኣበይ መዓስ ተሰዊኡ/ኣ እዩ ነይሩ።

ክቡር ህዝቢ ትግራይ!

ሎሚ ግዜኡ ኣኺሉ ዘይከም ካልኦት ብንቡር መስዋእቲ ደቅኻ ትርዳእ ኣለኻ። ንሕና እምበኣር እዚ ኣጋጣሚ ብምውሳድ ተኻፈልቲ ሓዘንካ ምዃና ክንገልጸልካ ንደል። በጃ ህዝቦም ንዝተሰውኡ ደቅኻ ከኣ በቲ ሓደ መንግስተ-ሰማያት የዋርሶም፣ በቲ ካልእ ድማ ንህዝቦም ራሕሲ ይግደፍሉ። ህዝቢ ትግራይ ድማ ጽንዓት ይሃብካ ንብል።

ለባም ህዝቢ ትግራይ!

ካባኻ እንጽበዮ እምበኣር ነዚ ኣሕዛኒ ኲነታት ብጽንዓት ሓሊፍካ፡ ርእስኻ ሓፍ ኣቢልካ ናብ ብልጽግናን ምዕባለን ዘሳግሩኻ ሰላምን ቅሳነትን ቀይስካ መጻኢኻ ብሩህ ከም እትገብር ኣይንጠራጠርን።

እግዚኣብሔር ጽንዓት ይሃብካ!!!

ክብርና ክምለስ ሓቢርና ንቃለስ!!!

ውድብ ሓድነት ኤርትራውያን (ውሓኤ)

14-10-2023